《拍拖係一個鬥照顧大家嘅遊戲》
啱啱一齊嘅時候，你哋純粹鍾意對方，完全估唔到呢個遊戲係咁難玩，有咁多嘢要去學。
對妳嚟講，本來妳係一個大小姐，啲嘢亂咁擺，啲情緒亂咁發洩，妳同男朋友利申定：「我可能會好野蠻，但你唔准鬧我呀！」不過，當拍拖後，情況完全唔係妳咁諗。
對你嚟講，本來你係一個好獨立嘅男仔，鍾意做乜就做乜，講乜就講乜，無嘢做就喺屋企打機，大時大節就約班Friend出去吹水，你同女朋友報告定：「我有時可能陪唔到妳㗎，但我保證妳同我一齊嘅時間會好開心。」 不過，當拍拖後，情況完全唔係你咁諗。
現實情況係點？
妳上到佢屋企，會自動自覺幫佢執好間房，叫佢以後唔可以搞到啲嘢咁亂，仲會貼滿啲由妳帶嚟嘅即影即有合照，走嗰時偷偷哋寫低memo紙叫佢唔可以掛住打機，要掛住妳。
而你以為自己係一個大男人，可以霸氣咁兄弟如手足女朋友如衣服，但女朋友一病咗，你推晒所有兄弟幫嘅約會，只係想喺女朋友隔離，問佢一句：「妳仲有無咁辛苦呀？」，慢慢開始唔再打機，課金都要偷偷哋，大時大節開始會同班Friend講：「我唔嚟喇，要陪女朋友呀」。
佢有時會熱到好似個玩到成頭汗嘅細路，所要妳會帶定包紙巾幫佢抹汗；佢有時會好驚自己一個人好悶，但又唔想阻住你，所以你去玩嘅時候學識要打畀佢比佢知道你有緊張佢，你甚至會講：「都係唔睇場波喇，不如依家過嚟陪妳？」
打邊爐嘅時候，你怕佢會「辣」親，妳怕佢啲丸未熟；Shopping嘅時候，你會帶個大啲嘅袋幫佢袋嘢，妳會每三步就問佢會唔會好重，不如我自己拎番啲啦；對方捱夜嘅時候，你會話我打住機陪妳，而妳會鬧佢夜瞓好傷身㗎，以後唔可以再係咁呀，要十二點前瞓！
你哋嘅關係，起初係Lv1嘅純粹開心，但慢慢學習到嘅技能愈嚟愈多，除咗玩之外，仲會顧及對方生活上每一項細節。兩個人渡過一個又一個難關，經歷過一個又一個甜蜜片段。當你哋嘅甜度升到LV99嘅時候，就會轉一個新嘅角色，由Lv1重新開始，學做一個好老公、好老婆。
（喜歡的話like我的page，會有更多故事及散文）
FB: 莎比亞
Follow IG睇獨家sweet相: sapeiar
八卦先好search嘅私人FB: sapeiar
最新出版：《鬼叫我唔識拍拖》
網上試閱：http://on.fb.me/1PKxJnS
Search